अब त अति भो
लोकतान्त्रिक देशमा विरोध गर्ने, आन्दोलन गर्ने र सरकारसँग असन्तुष्टि व्यक्त गर्ने अधिकार सबैलाई छ। त्यसमा कुनै समस्या छैन। समस्या तब सुरु हुन्छ जब हरेक विवादको अन्तिम उपाय नै अत्यावश्यक सेवाहरू बन्द गर्नु बन्छ।
डाक्टर हड्तालमा, शिक्षक हड्तालमा, पेट्रोलियम ढुवानी रोकिन्छ, सार्वजनिक यातायात पनि बन्द हुन्छ। अनि यी सबैको मार सरकारले होइन, हामीजस्ता सामान्य नागरिकले खान्छ।
यस्तो अवस्थामा सरकार कहाँ छ? स्वास्थ्य, शिक्षा र यातायातजस्ता आधारभूत सेवा निरन्तर सञ्चालन गराउनु सरकारको जिम्मेवारी हो। यस्ता क्षेत्रहरूलाई वार्ताबाट समाधान गर्ने वातावरण बनाउनु पर्ने हो, देश नै ठप्प हुने अवस्थासम्म पुग्न दिनु होइन।
र हड्तालमा उत्रिनेहरूलाई पनि एउटा प्रश्न छ। तपाईंहरूको माग जायज हुन सक्छ। सरकारसँग असन्तुष्टि पनि उचित हुन सक्छ। तर त्यसको मूल्य लाखौँ नागरिकले किन चुकाउने? सरकारमाथि दबाब दिने उपाय यस्तो पनि हुनुपर्छ, जसले आम जनतालाई अनावश्यक दुःख नदियोस्।