नविन शाक्य

मलाई जुका पटक्कै मन पर्दैन तर जुकालाई भने मसँग विशेष माया छ जस्तो लाग्छ! केही दिनअघि हामी चाकु खोलाको ड्याम साइट पुग्न पैदल गएका थियौँ। वर्षा भइरहेको थियो र जुकाको शिकार हुने म मात्रै भएँ। जुका शरीरभरि टाँसिएका थिए। एउटा–एउटा निकाल्दै जाँदा २८ वटा पुगेपछि त मैले गन्नै छोडिदिएँ।

यो मेरो लागि नयाँ कुरा भने होइन। वर्षायाममा हरेक पटक हिँड्दा रगतले लतपतिएका खुट्टा लिएर फर्किने म मात्रै हुन्छु अरू सबै भने जुकाको टोकाइबाट प्राय जोगिएर आउँछन्। सायद म उकालोमा अलि बिस्तारै हिँड्ने भएकाले होला वा मेरो रगतमा नै जुकालाई मन पर्ने केही विशेष कुरा छ।